Para sa Makabagong Bayan

May paniniwala ako subalit hindi ako deboto na sagradong Katoliko. Hindi rin ako ‘yung tipong kumakausap sa mga tao na tangan ang bibliya at tila ba nagsesermon na pastor. Subalit sa araw-araw na nagigising ako mula sa mahimbing kong pagkakatulog eh alam ko kung paano ihiwalay ang tama sa mali sa perspektibong naaayon sa makabagong panahon.

Sa isang balita ngayon eh sobra kong naalala ang mga eksena sa sinakulo. Habang ang lahat ng mga tao ay nakamasid sa entablado eh isang tanong ang ipinaabot ni Ponsyo Pilato. “Ano ang nais niyong gawin ko?” Ang mga tao naman ay buong lakas na nagwikang, “Pakawalan si Barabas at ipako sa Krus si Kristo.”

Nag-trend pa sa Twitter ang hashtag na #FreeCarlosCeldran, and tanong ko sa mga tao eh “teka, bakit ganun?”

Si Celdran ay isang tour guide sa Manila na binabayaran para ipagmalaki ang ganda ng Pilipinas. Malaki ang naitutulong niya sa aspetong pagpapabuti sa relasyon ng mga dayuhan sa ating mga Pilipino. Subalit isang pagkakataon ang lubhang nagpasikat sa kanya. Dahil sa paniniwala niya eh pinaabot niya ang opinyon niya sa maling pagkakataon.

Sa isang sagradong pagtitipon sa simbahan eh nanghimasok siya tangan ang plakang may nakasulat na ‘Damaso’, patungkol sa mga pari, sabay sigaw na “Huwag kayong mangialam sa pulitika.” Sa naturang pagtitipon ay labis na ikinagulat ng mga panauhin ang eksena.

Biglang dinala si Celdran palabas sa simbahan at kinasuhan ng pambabastos sa relihiyon. Nitong nakaraan eh hinatulan siya na may kasalanan at nararapat na makulong ng mahigit isang taon.

Sa mga nagsasabing #FreeCarlosCeldran, ang hatol daw ay tumapak sa kalayaang magpahayag ng mga Pilipino na labis na ipinagtatanggol ng konstitusyon. Masyado na rind aw luma ang batas at dapat na itong amyendahan. Walang kasalanan si Celdran nais niya lang ipabatid ang opinyon niya na saloobin din ng halos 90% Pilipino. Masyado rin daw malupit ang simbahan.

Kung pagbabasehan ko ang mga ideyang iyan, paniguradong pasok ako sa bilang ng mga Pilipino na nasa sampung porsyento. Isa rin ako sa magsasabing hayaan natin ang hustisya na gumulong at kung sinasabing dapat may makulong eh dapat may makulong.

Si Celdran ay katulad ni Barabas. Siya ay nagkasala at dapat niya itong pagbayaran. Oo, napatawad na siya ng simbahan subalit ang batas ay batas, dapat may managot ditto dahil kung wala ay nakakatakot isipin na kalokohan lang ang lahat ng mga bagay.

Malinaw sa lahat ng mga balita na si Celdran ang nanguna at naghimasok sa sagradong lugar para sa mga Pilipino. Malinaw sa lahat ng mga balita na si Celdran ang unang sumigaw at nambastos sa mga nananampalataya.

Hindi siya inimbita subalit siya ang nanghimasok at sumira sa pagkakataon pati na rin sa sarili niya. Kahit saan ko tignan eh nagkamali siya at dapat siyang maparusahan. Kung nais natin, mapa-tama man yan o mali na magpahayag ng saloobin natin eh mayroong tamang lugar at pagkakataon.

Lubhang luma na raw ang batas. Bakit hindi natin ito binusisi at bakit hinintay muna natin na may maparusahan bago tayo umapela. Isa ito sa mga nakakagalit na personalidad ng mga Pilipino. Puro reaksyon imbis na dapat eh simula pa lang eh umaksyon na para itama kung ano man ang mali. Kung meron mang mali eh dapat itong hinahanap at hindi hinihintay.

Hindi tayo nagsalita dati tungkol sa batas, bakit kung kelan mayroong ganito na isyu eh saka tayo magre-react ukol dito.

Maaaring malupit ang simbahan, lalo na kung nagse-sermon eto sa publiko at pati ako eh ikinasasama ng loob ito, subalit ang simbahan na kinikilala ko eh hindi ako inimbitang puntahan sila. Kusang loob akong pumunta sa kanila at sa pagkakataong ginawa ko ito ay dapat tanggapin ko na ang pinaniniwalaan nila.

Ang paniniwala ng simbahan ay gaya lang ng pagsali sa isang grupo. Kung ayaw mo ng pinaniniwalaan nito ay umalis ka at tapatan ito sa tamang panahon, lugar at pagkakataon.

Maraming isyu sa kaso na ito subalit sa nakikita ko, sa simula pa lang eh may pagkakamali nang ginawa si Celdran. Hindi maitatama ng mali ang isang mali kaya kung siya ay hinatulan eh dapat niya itong panagutan.

Dapat na alam natin at pinag-iisipan ng mabuti lahat ng mga ikikilos natin. Dapat din ay handa tayong tanggapin kung ano man ang magiging resulta nito.

Ito ang payo ko sa makabagong mga tao. Huwag tayong padalos-dalos at intindihin natin kung ano ang dapat.